搞 home gathering，少不免要一點啤酒助慶，之不過人人酒量大不同，一人一罐，最後分分鐘個個「養金魚」，好浪費。日本有生產商就推出「六合一」啤酒桶，同時用六罐啤酒自製啤酒桶，仲可以隨時加泡。
日本 green house 推出的 Party Beer Server，睇落似一般冰桶，箱內可以擺放六罐啤酒，無論 250 毫升、330 毫升、350 毫升定 500 毫升都得，中央位置可擺放保冷劑，室外一樣有冰凍啤酒供應。不過反轉個蓋，會發現蓋底連住六條吸管，其實吸管作用是分別負責「抽取」啤酒之用，而桶面就設有拉掣，拉低就有啤酒送到，點都好過一罐一罐慢慢開，有氣氛又有話題。
而 Party Beer Server 不但識「六合神功」，更加識得玩打泡，因為箱內設有超音波功能，只要將桶面拉掣推上，超音波就會以每秒鐘四萬次震動，噴出又細又滑的啤酒泡。最重要是 Party Beer Server 只需三粒 AA 電就可以操作，體積亦只有 202 × 296 × 270mm，加上 2kg 重量，拎上朋友屋企用都好方便。
售價：16,800 日元（約 HK$1,176）