【家居自煮】有片！一蒸一燒一炒　實戰 De’Longhi 3D 空氣全能鍋

可以一機多用的 De’Longhi MultiFry 3D 空氣全能鍋，蒸、煮、炸、煎、烤、炒都做到，今次就特別實地試用，分別進行蒸、燒及炒功能，究竟結果如何？

蒜蓉粉絲蒸鮑魚
雖然食譜用 6 隻鮮鮑魚，但既然「有貨」在手，當然絕不客氣，一口氣蒸夠 11 隻鮮鮑魚，不過一樣無問題，蒸 10 分鐘就已經完成。由於選用平底鍋模式，所以只有下方發熱，利用蒸氣煮熟鮑魚之餘，鮮味亦得以保留，既簡單又好味。

蜜汁叉燒
將預先腌製好的半肥瘦梅頭肉，放入鍋內，並以烤焗模式，以上下熱力同時進行烤焗，每面各烤 12 分鐘，最後再於表面搽上麥芽糖就完成，聽落好似好兒戲，但結果相當有驚喜，外表微焦之餘，肉質亦十分鬆軟，推介之選。

乾炒牛河
顏色均勻，鑊氣充足，無黐底，「自動炒」信得過。煮法亦簡單，裝好攪拌槳，用平底鍋模式，放入蒜粒及牛肉炒至八成熟，加入河粉及其他配料，之後就關上蓋，建議勿用筷子攪動，否則會令河粉變碎，最後倒入老抽調校色水，食得。

售價：HK$2,688（示範攤位優惠價：$2,288）