想方便又快地歎杯咖啡，好多人都會買部膠囊（capsule）咖啡機，放粒 capsule 入去，㩒個掣，十零廿秒後就有得飲，不過方便（懶？），應該無人會嫌多，Nespresso 新機 Prodigio，可以連部咖啡機都唔使掂到，用手機㩒兩㩒，已經沖到咖啡，以後每朝都可以「未刷牙，先沖啡」。
Nespresso 新機 Prodigio，「暗藏」的最大賣點，就是可以用藍牙與手機連接，大玩無線沖咖啡。用法其實好簡單，先在手機裝上 Nespresso 專用 app，與 Prodigio 連接後，於 app 內，就可以選擇想沖 Ristretto、Espresso 抑或 Lungo，實際試用過後，反應亦算快，㩒掣後約三幾秒，Prodigio 已經馬上開工，而且在 app 內可預先設定沖調時間，每日起身都會有杯靚咖啡等緊你，諗起都爽。
除了可以無線操作，專用 app 內亦提供 capsule 管理功能，只要預先輸入膠囊數目，當每次使用後，就會自動扣減，無貨時會識得提醒用家入貨。而 Prodigio 亦設有自動退囊裝置，使用後的 capsule，會自動跌落棄置格內，可以足夠擺放十多個已使用的 capsule，毋須逐次扔 capsule，方便。
新機已經在香港正式開賣，售價 $2,188，另外亦設有連打奶器型號，售價 $2,888。