電飯煲，向來是廚房中最具「仙氣」的一位，永遠一身白衣，久不久又識噴氣。雖然，近年不少 IH 電飯煲都「還以顏色」，不過講到色，日本人肯定最耍家，尤其是神明電飯煲，向來玩得出色，日前更加推粉紅色版本，勁搶眼。
神明（akafuji）推出的 poddi 電飯煲，就算對其「十分鐘煲好飯」的功能無印象，如果見過的話，都應該會記得，因為外形特別又夠簡約之外，所起用的顏色都好易入腦，過去曾推出白、紅、啡、綠、黃、橙六種顏色，不過新推出的粉紅色，賣相更加破格，迷人程度絕對爆錶，新顏色預計今年 5 月中上市。
其實，神明不單推出電飯煲，其真正身份，更是一間白米供應商，推出經過處理的 softsteam 米，除了強調毋須洗米、浸米之外，若配合 poddi 使用，更可以十分鐘時間，煲出一鍋靚飯。除白米外，神明同時亦有生產糙米及糯糙米。
售價：4,980 日元（約 HK$350）
*請留意，日本所使用的電壓與香港不同，在當地購買之電器，或需接駁變壓器，才可於香港使用。