外國不少家庭的後花園，都有個大水池，可以一面浸一面享受陽光，恨死隔離。之不過想更加特別兼出色過人，大可試試由德國 Flugzeugmoebel 公司推出的 A320 飛機引擎按摩池，齋睇，已經好型。
將飛機零件改裝，過去都有不少作品，不過飛機引擎體積大，多數「拆件」改裝。德國 Flugzeugmoebel 過去擅於將飛機部件改變用途，今次將引擎外殼循環再用，打造成按摩池，極之有水準。首先，池頂保留引擎外殼的金屬部分，兼且於池外四周，搵到原本引擎外殼上的注意字眼，配襯底部的木裝飾，夠原汁原味又有按摩 feel，改裝功力值得一讚。
池內高度為 160cm，並設計成兩階級，池內預設 12 個按摩噴射位，覺得未夠喉，可以額外加裝更多噴射位，又或者裝埋加熱器，齊齊玩暖水按摩，若然想再講究，再俾錢噴上自己心水顏色。雖然，好似樣樣都要加錢，不過，池邊條木梯，就隨池附送，放心。
售價：19,990 歐元（約 HK$170,000）