【家居自煮】掃 QR Code 自動開爐　Tovala 智能蒸焗爐

新一代蒸焗爐功能多，蒸炆炸焗樣樣都識，想玩得出神入化，不但要睇熟說明書，更要有「實戰」經驗先得。而 Tovala 將複雜簡單化，只要先掃描食物上的 QR Code，智能蒸焗爐就會自動開爐。

從集資網得到成功，繼而推出市場的 Tovala 智能蒸焗爐，操作好簡單，將食材放入爐後，再掃描包裝上的 QR Code，蒸焗爐就會自動調校時間及火力，之後就可以等食。當然，亦可以專用手機 app 控制火力及時間。

聽落相當方便，但 Tovala 明顯志不在此，因為需要使用其自家製的食材，才可使用 QR Code 進行智能煮食，但幸好 Tovala 機價算抵玩，開價 $399 美元（約 HK$3,112），大可作為一般蒸焗爐使用。