廚房電器,向來都有親疏之別,部分可以日日見,例如電飯煲、煮食爐等,而另一部分,就每隔一段時間先會見一次,例如麵包機、豆漿機,甚至是攪拌機。不過,試完 Philips 的 Avance Collection 攪拌機之後,個人認為,其實,大家可以日日見。
除非家有初生嬰孩,需要經常製作糊狀食物,否則,攪拌機的確毋須要見得太密。之不過,Philips 最新的 Avance Collection 攬拌機(型號 HR2099/90),不單止可以攪,更加可以煲,應該日日見都無問題!講外形,其實 Avance 與一般攪拌機無分別,不過拎開攪拌杯後,就會見到機座的頂部,裝有大型發熱板,而廠方亦都做足安全揩施,當攪拌杯完全放上機座之後,機座的感應器確定攪拌杯「坐穩」後,先會接通電源啟動,否則就完全無反應,抵讚。
因為識發熱,所以就算材料「生勾勾」,亦可以直接放入攪拌杯,之後再選擇對應模式,就會自動開工去煲湯。而 Avance 設有煲湯、蔬菜濃湯、豆漿、粥及手動,共五種主要模式,當調較至手動,則代表手動調校溫度,分別有高、中及低三種溫度選擇。另外,設有四段攪拌速度調校,以「P」則是碎冰模式,需要按實才轉動,放手就會馬上停止。
了解基本功能後,就到實際試用,先試煮雜菜湯,大多數香港人放工都無時間買餸,所以索性用兩罐現成罐頭湯,加幾個蕃茄及紅蘿蔔粒,連水都無落,以蔬菜濃湯模式,「煲」 25 分鐘。期間,Avance 會自動間斷地進行攪拌,之後就慢慢聞到香味,最後就會顯示「Hot」字樣,代表已經煲好。
![dsc06912_2](https://betterhomeweb.files.wordpress.com/2017/03/dsc06912_21.jpg)
玩完鹹,再玩甜,玩完熱,再玩凍。今次目標唔使急,最緊要快,所以整香.蕉.奶.昔,三隻蕉、一公升鮮奶加三匙雪糕 ,先用轉速「1」開五秒,再用轉速「3」開 20 秒,半分鐘唔使,已經有得飲。
![dsc06923_jpg](https://betterhomeweb.files.wordpress.com/2017/03/dsc06923_jpg.jpeg)
整體而言,Avance Collection 打破傳統攪拌機印象,並非一味得個攪字,仲識煲湯、煲糖水、煮粥等多種功能,而且只要將材料準備好,一口氣倒晒入去就得,講方便,的確值得俾個高分。如果,外形再靚仔些少、價錢再平返些少、條電線再長返些少…,就可謂上中下路都毫無破綻。
售價:$2,490