雖然話香港人撐香港人，不過之前部港產智能咖啡機，出貨日期一再走數，令不少人對智能咖啡機能否成真，仍然存在懷疑。日前，一部名為 Spinn 的智能咖啡機，正式接受預訂，預期交貨日期：2017 年中。
點解智能咖啡機可以令一眾咖啡迷趨之若鶩？一早起身，已經有杯靚咖啡等你；可以隨時改變口味，一部機沖出不同味道的咖啡；大公司，用手機預先沖定，行入茶水間即時拎得走，減少講是非時間 :)。早前 Nespresso 在港推出的 Prodigio，可以用手機預校時間沖製，都算得上智能，不過 capsule 機，未必人人受落。
今次 Spinn 智能咖啡機，不單用咖啡豆，更加非常環保，只要將咖啡機連接至 WiFi，就能夠從手機直接落柯打，即時進行煲水、磨豆、沖製等步驟，能夠沖出十多種不同口味，並且能夠連接 Amazon alexa，作出語音指令，「出句聲就有得飲」。
其實，Spinn 的厲害之處不止於此，因為 Spinn 是全球首部採用離心沖製方式的咖啡機，咖啡殘渣會經過壓縮處理，可作種植用途，並且 Spinn 與物聯網平台 Ayla 結成聯盟，當偵測到咖啡豆快將用完時，用家可透過手機直接落單購買，雖然香港未用到，不過香港地，買咖啡豆「其實唔難」。
新機分為三個版本，Original 包括主機、濾水器及50元優惠券；Original plus 包括主機、濾水器、水樽、100元優惠券及優先發貨；而 Original Pro 包括主機、濾水器、水樽、200元優惠券、打奶器、特大容量豆格。