用洗衣機洗衫，最少都要落洗衣粉、柔順劑，甚至消毒液，其實，太多化學物品共冶一爐，之後又再著上身，點都會令人有點擔心，而 Bosch 推出首部活性氧洗衣機，洗衫順便消毒兼殺菌。
利用活性氧（active oxygen）技術殺菌，其實並非新鮮事，不少空氣清新機都已經採用，但用落洗衣機，就絕對是第一次。Bosch 全新的 Series 8 洗衣機，在機內裝有兩個噴咀，於清洗過程中，會噴出兩次活性氧，可以去除細菌、塵蟎及致敏原，廠方指能夠消滅 99.99% 細菌，連消毒液都慳返，但整個洗衣過程就要多 30 分鐘。而毛公仔、大褸等「忌水」的衣物，如果直接放落洗衣機，隨時變形收場，所以新機可獨立開啟殺菌程式，45 分鐘就變返乾淨。
而新機亦用上最新 VarioDrum 洗衣筒，由於筒內設有不同斜度，當順時針轉動時，斜度較低的一方會沖刷細緻衣物。當反方向轉動時。斜度較高的一方則以強力沖刷衣物上的污漬。除此之外， EcoSilenceDrive 磁浮變頻無刷式摩打及 AntiVibration 螺旋紋防震側壁設計，可以降低洗衣機運作時的音量。
售價：$10,800