新款吸塵機，講樣又要講功能，外形要靚仔之餘，又要落得地板上得大床。不過，日本三菱新推出的 iNSTICK，不單吸塵，機座仲做埋空氣清新機，究竟點玩法？
日本人對吸塵機絕對情有獨鐘，亦都好肯嘗新，當年 Dyson 就最先被日本人欣賞，睇睇日本品牌的吸塵機，其實同樣好精彩。三菱最新名為 iNSTICK 的吸塵機，先睇外形，近乎圓柱體式賣相，線條已經夠吸引。用上無線手提式設計，方便吸櫃頂、窗簾及梳化等位置的灰塵外，換上長吸把，同樣可以好好招呼地板，最重要機身重量只有 2.1kg（當使用短吸把，重量更只有 1.6kg），拎得耐，隻手都可以好輕鬆。
吸力方面，iNSTICK 採用旋風式氣流設計，廠方稱風速每秒可達 60 米，繼而利用離心力，將灰塵及空氣分隔，而且會將 0.3μm 以上的微粒子保留於機內，並有效減少吸塵時所發出的異味。而電池續航力，充電 90 分鐘後，可連續使用 20 分鐘。不過 iNSTICK 最精妙之處，是在於其機座，破格地具有空氣清新機功能，內置 HEPA 過濾網，當中高階型號 HC-VXF30P 附有除臭功能，一物兩用，又可以慳地方，服。
售價：約 45,000 日元起（約 HK$3,060）
*請留意，日本所使用的電壓與香港不同，在當地購買之電器，或需接駁變壓器，才可於香港使用。