每朝起身，總離不開一塊鏡，洗面刷牙要望，襯衫換衫又要望，總之，鏡，好重要。不過，美國三位大學生，將鏡變得更出神入化，加入屏幕及鏡頭等設備，望鏡之餘仲有大量資訊話你知。
名為 Perseus Mirror 的智能鏡，由三位來自美國賓夕凡尼亞州華頓商學院的學生所研發，除了掛牆亦可以座枱使用。而內涵亦絕不簡單，皆因 Perseus Mirror 的硬件規格，猶如一部手機，內置有四核心處理器、鏡頭及喇叭，並且支援藍牙及Wi-Fi。最重要的是，幾乎整個鏡面，都可變作屏幕使用，顯示各類型資訊，例如天氣、交通消息及新聞等，大可一面上 YouTube，睇住化妝教學照住做。
廠方計劃將會開放資源碼，吸引更多第三者開發對應程式，玩法更多元化。現時 Perseus Mirror 已接受預訂，設有金、黑、銅、灰及紫色，預計今年四月發貨，售價為 249 美元（約 HK$1,940） 。