想熨衫可以快靚正，日本 Panasonic 年多前已經幫你諗好計，推出輕便式小熨斗，不單止用蒸氣熨衫，仲可以除臭，結果大受日本用家歡迎。日前更發表新一代型號，無論噴氣量、預熱時間，就連手柄都齊齊改良。
型號為 NI-FS530 的全新輕便蒸氣熨斗，驟眼望跟前作差不多，重量只有 700g，設有 50 毫升水箱，並繼續採用對稱式設計，不過反轉睇睇，就知有分別，因為噴氣孔由之前的直列式，改為略呈橢圓形，令頭尾噴氣孔距離由 4.2cm，增長至 6.2cm，蒸氣噴射範圍更廣闊。而且預熱時間亦縮短 20％，只需 24 秒就可以使用，朝早起身想「即熨即著」，或者要除菌除臭，一樣得。
此外，新機在握持方面亦有改良，將弧型手柄位改成直柄，手柄闊度因而增加 6mm，對付刁鑽位置，就更得心應手。另外，仲有一樣新功能，就是如果熨斗閒置超過 60 分鐘，就會自動關閉加熱功能，熨完趕住去返工，因而忘記熄機的話，亦都無後顧之憂。新機將於四月尾在日本開賣。
售價：約 12,000 日元（約 HK$840）
*請留意，日本所使用的電壓與香港不同，在當地購買之電器，或需接駁變壓器，才可於香港使用。