【家庭電器】摺得埋吹得爽　日本阪和三頭風扇

又到夏天，想買一把特色風扇返屋企，既要有睇頭，又要吹得夠，最重要人無我有，盡顯獨特性的話，日本阪和（PRISMATE）新推出的三頭風扇，收視已經爆分，兼且可以隨時摺埋，點慳位都諗埋，啱晒。

近年風扇興玩簡約，但阪和新推出的 PR-F007 風扇，卻以工業風格殺出重圍，機架、外罩，就連扇葉都以金屬打造，共有銀、金、銅三種顏色揀，當中以銅色最具玩味，工業味更濃之餘，配襯木製傢居，效果最 match。

而 PR-F007 的「一開三」設計，可以同時提供三個送風角度，每把「風扇頭」可作上下 104 度、左右 80 度調校，廠方更設有香薰座，掛在外罩上，幫手散發清新香氣。雖然話 PR-F007 上中下路都毫無破綻，不過只限手動調校角度，但都可以用遙控器調校兩段風速，要型，有時就要付出些少代價。

家居環境所限，有時擺一把風扇都難，何況要擺「三把」風扇？不過毋須擔心，因為 PR-F007 可以如摺梯般，摺起攝入門後、櫃邊等罅隙位，夠晒慳位。

售價：15,400 日元（約 HK$1,080）

*請留意，日本所使用的電壓與香港不同，在當地購買之電器，或需接駁變壓器，才可於香港使用。