【家庭電器】乖乖排隊跟住熨 英國 effie 自動熨衫機
好小人會鍾意熨衫，所以搞自動化，絕對大有市場。英國有公司就推出 effie 自動熨衫機，可以一次過最多熨 12 件衫，兼且仲識有香味，又或者當乾衣機用，一樣得。
effie 外形四四方方，其實為方便擺放而設，底部設有滾輪，可以輕易移動。當使用時，只要拉開兩面的掛架，將衣物掛上，就會自動輸送入機器中，然後進行熨衫程序，約 3 分鐘就完成一件衫，之後衣物會移至另一面，拎起就著得，非常方便。
最多可一次過掛上 12 件衫的 effie，底部設有水箱，用作提供蒸氣，並且可放入香精，令熨完的衣物帶有香味。此外，effie 亦可當作乾衣機使用，同樣最多可一次過為 12 件衣物進行烘乾功能。預計明年 3 月發售。
售價：699 英鎊（約 HK$7,000）