【家庭電器】上下兩格 全港首部 LG TWINWash 洗衣機
每次想用洗衣機洗衫，首先要儲埋一堆，否則嘥水又嘥時間。不過 LG 在港新推出的 TWINWash 洗衣機，設有上下兩部分，多有多洗，少有少洗，兼且洗衫乾衫蒸氣一次過。
顧名思義，TWINWash 洗衣機設有上下兩部分，上部分為前置式洗衣機，容量為 12kg，而下部分為頂揭式 2kg 洗衣機，兩者可同時或獨立操作，想洗幾件衫，或者要分開洗，一樣無問題。而且 TWINWash 將操作介面完全融入於機面的黑色圓形部分，並可作輕觸操作，賣相令人眼前一亮。
而 TWINWash 內在亦非常突破，使用類似汽車的懸掛避震及滾球（圖右）設計，加上採用直驅摩打，將摩打與滾桶距離縮短，大幅減少機身震動，兼且運作時更加寧靜。
功能方面，TWINWash 設有冷凝式乾衣技術，洗衫乾衫一部機搞掂，夠晒慳位。加上 TrueSteam 技術，可以蒸氣為衣物進行殺菌及去除異味，有效去除 99.9％ 家居致敏原。加上 TWINWash 支援 LG 的 IoT 物連網功能，即是透過手機進行遙距操作，不但能夠隨時遙控開機，更可加入不同的洗衣程序，甚至睇實洗衫狀態，洗完衫，幾時洗完都即刻知。
現時 TWINWash 聯同 InstaView Door-in-Door 雪櫃及 SIGNATURE OLED TV W 牆紙電視，齊齊於灣仔的 OVO 家居店展覽至明年 2 月 8 日。
售價：
TWINWash 洗衣機：HK$21,980
G-CS1612W 前置式洗衣機：HK$ 13,980