【家庭電器】造型逼真 設備齊全 日本 TOTO 衛浴紙模型擺設
日本人向來認真，日本衛浴品牌 TOTO 當然亦不例外，日前新推出的衛浴擺設紙模型，同樣好認真，馬桶、洗手盆、水龍頭有齊，想砌成個浴室？一樣得。
TOTO 推出的紙模型，全部免費下載，以旗下產品為範本，種類齊全兼賣相跟到足，包括招牌產品 AH 及 RH 系列馬桶。但難度亦絕對不低，廠方判定難度為四星及五星，五星難度預計需要兩日時間先可以完成。
除馬桶外，更有浴室場景，包括洗手盆、鏡及櫃等，當中最新的 Restroom item 01，以殘疾人士洗手間為題，加入不少輔助設施。
若然覺得浴室太單調，TOTO 亦都有廚房提供，廚櫃、爐頭、鋅盤，甚至抽油煙機一應俱全，反而只屬三星級難度，可以小試牛刀。
