【家庭電器】有片！潛入機內睇真啲　Panasonic NP-TFM1 洗碗碟機

香港 Panasonic 首次引入桌上型洗碗碟機 NP-TFM1，不少人亦都心大心細，希望繑埋雙手等洗碗，今次 BetterHome.hk 就潛入 NP-TFM1，睇睇洗得有幾乾淨。

既然身為桌上型，體積當然要擺得上枱，NP-TFM1 體積只有 300ｘ470ｘ460mm，尤其 300mm 的厚度，一般香港家居的廚房環境，都可以放得落。

機面亦非常簡潔，只有操作按鈕，機門採用一塊過的設計。打開後，可將盛碗盤拉出，據廠方表示，最多可擺放 4 人用的餐具，今次測試雖然未有完全「塞滿」，不過擺放 2 人餐具後，仍有大量空間，擺 4 人餐具，相信無難度。

設有 5 種操作模式的 NP-TFM1，「標準」要 74 分鐘，還有今次測試的「超快速」模式，只要 42 分鐘就完成。其實擺好碗碟、落洗碗碟機粉、閂門之後，唯一可以做的，就是靜心等待。

由於 NP-TFM1 會以 70°C 熱水進行清洗，所以完成後，不但所有茄汁、醬油及飯餸漬，全部消失得無影無蹤，碗碟亦會感到微溫及乾爽，的確慳返不少洗碗時間。而且用水量只需 9 公升，夠晒慳水。

不過 NP-TFM1 需要接駁來水喉及去水喉，所以裝機要交由專業人士代勞，但之後就毋須人手入水，加上出水喉設有吸盤，可吸附在鋅盤內，諗得非常周到。

 

售價：$4,580

產品網頁