突然之間天寒地凍，每朝起身簡直仲辛苦過跑馬拉松，刷完牙洗完面，先發現原來件恤衫仲未熨，點算好？Philips 新推出的手提蒸氣掛熨機，三分鐘就可以將摺痕完全趕走。
型號為 GC442 的手提蒸氣掛熨機，重量只有0.9 kg，內置 200 毫升水箱，入滿水之後，接駁好電源就會自動啟動，只需一分鐘時間預熱，就可以即時熨衫。GC442 每秒噴出 30 克的蒸氣，具有除垢蒸氣技術，在熨衫時可以將衣物上的污漬清走。
以一件充滿摺痕的恤衫作實際測試，只需來回幾次，就已經將大部分摺痕熨平，而呈「眼睛」形的壓熨板，可以容易到達衫鈕與衫鈕之間的位置，使用上非常方便。不過，因為一按掣就會噴出蒸氣，使用時要小心，避免蒸氣誤噴造成熨傷。而且熨完之後，壓熨板仍然處於高溫狀態，記得要妥善放好，等冷卻後才收埋。另外，隨機附有熨衣墊，若果想衣物更加筆挺，可將熨衣墊放在床上或枱面上熨，效果會更好。
整體而言，GC442 無論外形、使用及售價，都有相當不錯的表現，對於香港家居環境，毋須每次都勞師動眾開熨衫板，的確可以慳返不少時間及功夫。
售價：$848