塵，應該用吸塵機，之不過「水」，又應該點吸？日本就有專門為吸水而設的吸水機，外形似足吸塵機，用來吸水、抹窗統統做到，兼且售價激抵，HK$350 就可以入手。
名為「スイトリーナー」的吸水機，昨日（3 月 2 日）才於日本正式開賣，外形貌似吸塵機，重量只有 682g，操作上，其實亦跟吸塵機相若，拎起，開機，就可以吸，不過，分別在於吸水。其實，「スイトリーナー」能夠吸水的原因，在於其吸咀設計，設有一個個小孔，令水份可以被吸走。而機內亦設有 160 毫升儲水箱，吸走後的水份，就會被儲存在此，之後只要開蓋倒走就得，打瀉水，毋須再拎毛巾抹餐飽。
既然識吸水，功能上當然可以再加點新意，所以在吸咀下方，裝有一個噴咀，作用是可以加入清潔劑，在清潔玻璃或鏡子時，可先將清潔劑以霧狀噴在玻璃或鏡子上，然後再利用吸咀直接吸走，令抹玻璃變得慳水又慳力，值得一提的是，只要換上其他吸咀，「スイトリーナー」亦可當作吸塵機使用。
現時「スイトリーナー」只在日本發售，售價為 4,980 日元（約 HK$350），絕對極具吸引力，不過香港是否又得物無所用？應該未必，因為隨機雖然附送 100V 火牛，但「スイトリーナー」採用外置火牛充電形式，而其輸入電壓為「DC 5V 1000mA」（操作電壓為 12W），換言之，大可在香港買個萬用火牛，再將輸出電壓調較至相同（或者輸出電壓已經相同）就用得。
