【家庭電器】實機測試！　TESCOM 白金納米膠原蛋白 TCD5000 風筒

今個月初，BetterHome.hk 率先為大家報導，日本風筒品牌 TESCOM 的白金納米膠原蛋白風筒 TCD5000，快將有行貨在港開賣，今日 BetterHome.hk 第一時間取得實機，究竟將「白金＋納米＋膠原蛋白」吹上頭，感覺如何？

今時今日，已經好難搵到 made in japan 風筒，而 TESCOM 的白金納米膠原蛋白風筒 TCD5000 正是其一 ，皆因是廠方特別為亞洲市場而設，主打的膠原蛋白、白金，以及納米水霧散射等特點，全部可以留低，繼續滋潤髮質及鞏固髮色之餘，亦保留髮質水份。

隨風筒附有兩個風咀及一個風罩，外形方面，採用可摺疊手柄設計，使用時，重量分布集中於上方，與傳統風筒相近。機背設有納米開關掣，手柄按掣則分為兩排，其中一排是負責控制兩段風速，另一排則是調校冷、暖風，以及 scalp 模式。

當開啟此模式後，TCD5000 不止負責照顧頭髮，就連頭皮亦可護理。因為當白金及膠原蛋白經過納米處理後，吹到皮膚時，就會依附在皮膚角質上，中和自由基，延遲老化情況，甚至做到除菌功能，換言之，能夠令頭皮更加健康。細心睇，冷風模式其實兼任 facial，廠方表示每日使用，同樣有去菌及保濕效能，風筒都可以變靚啲。如果開啟納米，風咀頂部會有藍燈顯示，而在風筒側，會有不同燈號顯示使用模式。

由於試用時間 TCD5000 未算長，皮膚當然未有即時變到剝殼雞蛋般又滑又彈，反而當開啟最大風速時，就算近距離向皮膚直吹，亦未有「辣手」情況，但依然可以在短時間，將一頭長頭髮吹到乾透，翻查規格表，原來 TCD5000 具有 1700W 火力，每分鐘出風量為 1.4 立方米 。而乾透後的頭髮，據「髮主」表示，頭髮摸落較以往滑，較明顯的感覺是髮質彈性有所增加，令曲髮的篷鬆感更強烈。

 

售價：$1,588

 

查詢：3568 7885