愛 pizza 愛到不能自拔，一般口味又點會吸引到你，當然要自己整先過癮，不過就算識得搓粉，材料幾靚都好，「爐，先係最重要」，所以日本 TIGER 新推出電焗爐，就專為焗 pizza 而設。
雖然今次 TIGER 推出的 pizza 焗爐 KPX-S300，講到明屬業務用（即餐廳食肆用），但機身尺寸只是闊 53.4cm、深63.4cm及高 39.7cm，跟一般家用焗爐差不多，早知你會講：「個內籠細咁多，淨係焗 pizza，咪好嘥位囉。」你有你的道理，不過 KPX-300 一身「紅磚」外形，扮足傳統 pizza 烤爐，朋友見到，肯定人人圍住睇你做 pizza 師傅，一般焗爐又點做到，點計都值回票價。而且，廠方亦為家庭用家著想，正常 100V 電源已經用得到（當然香港就要加變壓器），甚至可以擺上枱用。
以焗 pizza 為終極目標，外形扮得似之餘，內在亦好重要，採用 1200W 遠紅外線作熱力來源，底盤更用上高密度炭，廠方稱此物料比金屬傳熱快兩倍及儲熱能力高 2.5 倍，可令熱力平均分布於整個 pizza，如果要焗一個 27 吋 pizza，只需預熱 25 分鐘，再放入 pizza 焗兩分半鐘就食得，再加上用隨機附送 pizza 專用的大木剷，為 pizza 出爐，成件事，型好多。
售價：約 40 萬日元（約 HK$27,200）
*請留意，日本所使用的電壓與香港不同，在當地購買之電器，或需接駁變壓器，才可於香港使用。